/

Santiago

坐咗三十個鐘頭飛機,終於到達智利嘅首都 Santiago。

/

Santiago

但係,好唔好彩,三個人嘅行李都寄失咗。我哋嗱嗱臨去同航空公司講,及打電話返香港搵保險公司傾。之後我哋都冇法,唯有照計劃去市中心搵地方住先。

/

Santiago

一出機場,得嗰七度,我又只係得一件短袖 T-Shirt,真係凍死!好彩C Big 隨身有多一件風褸,更好彩係呢件風褸唔係咁女裝,我先可以著出街咋。

/

Santiago

Santiago 係南美其中一個大都會,我哋就係住喺離市中心好近嘅旅舍。旅舍入面好 Colourful ,雖然唔係真係好乾淨,但都唔錯。我哋仲為呢喥個管理員改咗個名,叫 Wyman,只因佢成日都戴住冷帽,好似 Wyman 咁。

/

Santiago

住宿解決咗後,第一時間去買衫著,唔通日日都著住C Big 件衫咩!而另一方面,航空公司己搵到我哋啲行李,但要兩日後先能夠送返嚟俾我哋。

/

Santiago

Santiago 都幾靚,雖然係大都會一個,但市中心都有唔少藝術色彩,更有唔少畫家喺街頭畫人像畫呢。而另一邊,呢喥啲人都幾開放,喺公園真係隨處見到人親熱,亦唔怕你睇佢哋 Kiss 呢。

/

Vina de Mar

Vina de Mar 係一個離 Santiago 約個零鐘的沿海城市,我哋原先係定咗喺喥留三日,但點知天氣好差,日日都落兩,攪到我哋又冇地方好去。唉!我哋無聊到去超市買染髮劑返 B&B 染髮。哈,我哋發現,原來智利女人好鐘意染髮,啲染髮劑賣到成行成市,間間藥房同超市都大量供應㗎!

/

Vina de Mar

由於天氣真係唔好,日日落兩,所以我哋決定都係提早一晚出發,坐通宵巴士去下一站 La Serena,我哋夜晚八點左右上車,第二朝七點到,又可以慳返一晚住宿!

/

La Serena

喺 La Serena,天氣非常好,藍天白雲,溫度同濕度都唔高,好舒服嘅天氣。我哋一到站,就好快咁俾個肥婆 sell,住佢間屋!不過就同五個澳洲人一齊,但我哋都有兩間房,而間屋又有廚房,後園同洗衣機,都唔錯架!

/

La Serena

藍天之下,我哋首先去咗海邊,䏲下海鷗,又睇下 C Big 點樣沉咗落軟沙入面,哈哈哈哈!

/

La Serena

而其它時間,我哋都係慢步於市中心,坐下街路的咖啡茶座,都幾 relax !

/

Calama

過咗 La Serena 後,我哋又坐通宵巴士,去下個目的地 San Pedro de Atacama。不過由於途中要喺 Calama 轉車,轉車時間我仲記得係 Dos i Media,足足有兩三粒鐘,所以我哋就喺 Calama 食個晏同行吓。

/

Calama

呢喥以前係礦場呢㗎,所以都好有西部牛仔 feel,而且又剛好係星期日,街上都好熱鬧,仲有街頭表演。

/

San Pedro de Atacama

San Pedro de Atacama 係綠洲,而且安第斯嘅印加土著色彩好重。我哋今次住嘅地方麻麻,第一晚就已經嚇死⋯⋯呢間嘢,夜晚十二點打後就冇電,去廁所要帶電筒去出面嘅廁所,第一晚半夜我哋就一齊去廁所同刷牙,其中一個人拎住電筒照住廁所出面,一個就望住出面但電筒照住入面,最後一個人當然係痾啦!不過真係黑得交關,真係好嚇人㗎!另外,三四點時份,有人好大聲喺喥叫⋯⋯都咪話唔驚!

/

Tatio Geyser

Tatio Geyser 係全智利旅程嘅重點之一!行程深入安第斯山脈。

/

Tatio Geyser

我哋喺四點出發上安第斯山,睇 Tatio Geyser 的熱泉。

/

Tatio Geyser

一落車,只得零下十五度,好彩事先帶咗羽絨咋。

/

Tatio Geyser

呢喥真係勁靚、勁壯麗!

/

Tatio Geyser

天開始光時,太陽慢慢昇起,熱泉不斷噴出熱氣,而泉眼仲要係好 colourful 㗎!

/

Tatio Geyser

我哋三個不約而同咁去浸腳,喺咁凍又咁 natural 嘅環境下浸,真係人生一大樂事!

/

Tatio Geyser

沿途風光真係好靚,藍色嘅天、白色嘅雪、銀色嘅河、黃色嘅草⋯⋯有時仲會見到駱馬呢!

/

Salar de Atacama

除咗熱泉外,我哋下晝又趕去另一重點,鹽湖!唔係美國嗰個鹽湖城,而係真真正正嘅鹽湖呀。

/

Salar de Atacama

白色嘅鹽就好似雪咁,雖則唔及波利維亞嗰邊嗰個咁大,但都好震撼、好滿足!因為我真係末見過呢啲風光㗎!

/

Salar de Atacama

我哋三個全程都好開心,仲不斷唱詩歌??頌讚主、頌讚主,高聲歡唱⋯連我哋個司機都好開心咁聽我哋唱,哈哈!

/

Arica

過咗 San Pedro de Atacama,我哋又例牌坐通宵巴士去下一站,今次我哋坐另一間巴士公司嘅車,一間豪華一啲嘅巴士公司嘅車 Du Bus。下站係一個吸引我嚟智利嘅地方 Arica。話說有一次我睇尋找它鄉的故事,睇到智利篇介紹 Arica 的香港人,周生周太,我就被佢地吸引我嚟「搵佢哋」。哈哈!

/

Arica

喺呢道,我哋一搵到旅店就嗱嗱臨洗衫,因為去完沙漠地區都好多沙!真係辛苦 C Big!呢道又係綠洲,三面沙漠,一面向海!

/

Arica

因為太乾燥,所以我哋就走去買洗面奶。我哋求其咁入咗去我哋住嗰間旅店隔離嘅藥房買,點知原來呢間就係周生周太開嘅藥房,樓上就係佢哋屋企了!真係有緣!

/

Arica

佢哋好好客,請我哋食晚飯,我哋終於可以食返餐啱胃口嘅家常便飯,唔駛又要捱四份一個 Pole,即四份一隻燒鷄!因為喺智利去到邊都有四份一隻燒鷄賣。

/

Parque Nacional Lauca

喺 Alica,除咗去周太屋企,我哋重 Join 咗個 Tour上智利同秘魯及波利維亞接壤嘅安第斯國家公園 Parque Nacional Lauca •

/

Parque Nacional Lauca

今次去嘅地方,比 San Pedro de Atacama 更有安第斯色彩。

/

Parque Nacional Lauca

古老的教堂,見證了昔日傳教仕的足跡多偏遠,總之又係令我哋深滿足嘅一個地方啦!

/

Arica

除咗國家公園,我哋亦喺市內行啦一個下晝,尤其係去碼頭睇塘鵝,因為呢喥真係有唔少塘鵝㗎!而且,呢喥仲係周太拍尋找它鄉時嘅背景!

/

Arica

碼頭望出去,就係一望無際嘅太平洋,我喺喥諗,喺東北方,半個地球嘅對面就係香港,我哋家吓真係離開香港好遠好遠。我哋下一個目的地係復活島,我哋要坐廿八個鐘巴士返 Santiago,再坐六粒鐘飛機去。

/

Iqueque

當巴士經過 lqueque,又有個半鐘時間俾我地周圍行下!我哋就好快咁喺市中心繞個圈。呢喥亦係沿海城市,海邊有好多海獅㗎!

/

Iqueque

喺廿幾個鐘巴士旅程中,一直都有個服務員打點車上嘅一切。佢俾我哋嘅印象好深刻,因為個個乘客都喺喥瞓覺嘅時間,佢都要做野。邊個半夜到站,佢就要預早叫醒嗰個乘客,仲要落車幫佢搬行李,我哋都未見佢停過,真係幾辛苦。

/

Easter Island

由 Santiago 飛去復活島要六個鐘,LanChile 嘅機都好乾淨,比得上 Cathay!我哋一落機居然有當哋嘅美女接機,仲為每個乘客送上花圈,好熱情!哈哈!復活島地方唔大,我估坐車兩個鐘就可以兜一個圈,但由於嚟呢喥嘅航班唔密所以我哋迫住要住五晚。

/

Easter Island

第一日我哋行路上火山口,我哋只係跟住地圖,沿馬路上,兩個鐘左右已經到達。沿途,Stanley 走去摘野菓食,見佢第一啖已吐返出嚟,都知難食!哈哈,笑死我同 C Big。火山口都已經變成一個湖,都幾靚㗎!而呢喥周圍嘅石頭,好多都有刻上古代傳統嘅畫!

/

Easter Island

落山時 Stanley 話佢帶路,佢仲話佢自己係指南針。我哋信佢啦,點知都唔夠五分鐘我哋就好清楚行錯路,我同 C Big 勁笑佢指南針!

/

Easter Island

第二日,我哋決定租單車繞島一圈,目的係去云每一個 Moa 石頭人。我哋睇書,先知呢啲石頭人係好耐之前啲土著用來保護個島㗎!當然唔係乜嘢外星人做出嚟啦!

/

Easter Island

呢喥有好多大大小小嘅石頭人,全都係背住海向住島內,以保守呢喥,只有一座係向海,以睇住有冇敵人。

/

Easter Island

但係,原來踩單車繞一圈係好辛苦。呢喥嘅路好多都係凹凸不平,真係好彩冇跌低咋!最後我哋見太陽好似要落山咁,但我哋都仲要踩好遠先到鎮,於是C Big 走去截順風車 !又好彩截到,我哋先可以天黑前返到鎮,真係好好彩!

/

Easter Island

跟住,我哋又要坐六個鐘飛機去 Santiago 再轉機去 Puerto Mont 。我記得機上前面的一個澳洲女人,喺喥笑啲空組英文發音唔正,笑佢哋 One world 讀成 Wo Wo,真係唔要得!

/

Puerto Mont

喺 Puerto Mont,好不幸地又係幾日都落兩。原本我哋想睇嘅雪頂火山,好似富士山咁嘅,但乜都冇,乜都睇唔到!好無癮!

/

Castro / Chiloe

我哋見成日落兩,於是乎,我哋索性順路坐巴士同搭船去 Chiloe,一個書上寫係智利比較窮嘅地方。但我哋則喺呢喥玩得好開心,我哋仲喺呢喥食咗個好豐富嘅海鮮餐。

/

Castro / Chiloe

我想因為有太陽啦,呢日嘅心情特別好!但一返到 Puerto Mont 又係落兩,好彩,我哋住的民宿老闆好好心,幫我哋收起晾緊嘅衫咋!

/

Punta Arenas

喺智利嘅最後一站係 Punta Arenas,唔計小鎮,呢喥係智利最南嘅城市,我哋打算喺呢喥隨便咁行下,預備第二日去 Falklands 福克蘭群島。由於我對波鞋經過連日雨水嘅洗禮,都真係支持唔住了,所以我就順便喺喥買咗對 New Balance。

/

Punta Arenas

另外,對 C Big 嚟講,呢喥畀最一個好大嘅印象,原因係我哋住嘅民宿,佢哋嘅沖涼花洒水力好大,沖涼夠爽!哈哈!

/

Punta Arenas

而且,由於佢去完福克蘭之後,唔會跟我哋去阿根廷,比我哋早一個月回程返香港,所以佢要一個人坐四十個鐘飛機,由呢喥飛返香港,都幾甘㗎!