Helsinki
12點半先到達 Helsinki，機場好細，但都井井有條，一出機場就上咗 615T 號巴士，一直坐到去市中心的中央火車站了。
Helsinki
出到市區都成點半了，首先，第一時間將行李寄存喺火車站，咁就3歐羅！然之後去拎火車証，攪掂晒後就向市中心出發了。
Helsinki
冬日嘅 Helsinki，其實冇乜嘢好睇，周圍都係半溶的雪，氣溫喺四度左右。
Helsinki
魚市場附近就幾靚吓，遠處仲有小島，海海面則有幾片浮冰呢！
Helsinki
因為要趕火車，所以晚餐喺車站附近嘅 McDonald 食。唉，去 Toilet 都要俾錢，要1歐羅㗎！McDonald 都要收，都唔知有冇攪錯！於是死忍成粒鐘，等上火車先去！火車上嘅 Toilet 係唔洗錢㗎，又乾淨，哼！火車中遇到日本人、講國語嘅人，同講廣東話嘅人呢！
Helsinki
好了，快要瞓了，火車臥鋪都算唔錯，每間房都有鎖㗎！或者太攰啦，好好瞓呢。
Helsinki
但係，瞓火車都有夢遊！死末！夢遊中見到一個女仔，入咗我間房，同我講咗幾句後就走咗，我突然諗起佢會唔會拎咗條鎖匙走，於是我起身去衫袋搵鎖匙，搵到後睇一睇錶，得嗰四點鐘，唉！又知係萝遊啦，於是乎又繼續去瞓。OK！7點半啦，仲有25分鐘就到，但天仍然係半夜一樣黑！
Rovaneiemi
今日一早落火車，漫天飛雪，但天色仍然係好似半夜咁黑，心有啲怕，因為要走兩公里路先到 Guesthouse，平時當然冇乜問題啦，但如今人生路不熟，又凍又黑，行錯路就死了！好彩最後都冇行錯路！呢間 Guesthouse 唔錯，簡單嘅裝修俾我一種溫暖嘅感覺，或許呢啲就係北歐風格吧！
Santa Claus Village / Rovaneiemi
沖個涼後，就去趕巴士到 Santa Claus Village，真估唔到車程都幾遠吓！
Santa Claus Village / Rovaneiemi
另一方面，更估唔到嗰度好細，好快就走完一國，嗰度一直播住聖誕歌，真係有啲⋯⋯過時了！
Santa Claus Village / Rovaneiemi
我哋總算都喺嗰度買咗啲小東西，其實有點難落手，因為真係乜都超貴。
Rovaneiemi
中午食咗一個 Burger + French Fries，一杯朱古力，咁就又百六蚊港紙了！返到 Rovaneiemi ,喺超市搵到一啲 “叮飯”廿幾蚊港紙就買到，唔洗捱貴 Burger了。
Rovaneiemi
夜晚我哋去佐個 Snowshoeing 嘅 Safari，係行路入樹林去睇北極光。但天氣唔係好好，好多雲，又太“暖”，所以等左好耐都係睇唔到北極光！最後影咗幾張相就返去 Guesthouse了！不過，夜晚入北極嘅樹林都好好玩！
Pera
今日一早起身，開 Snowmobile 去一個北極的冰湖，叫 Pera，路程約 40 公里，但我哋開得唔夠快，所以都用咗兩粒鐘先到達。沿途見到野生嘅 Reindeer 同 Huskydog，但都冇影到相。到了 Pera，嗰度非常寧靜，而且難得嘅係有太陽同藍天，好鬼靚！
Pera
我哋喺湖中鑽咗三個洞，實行 Icefishing。哈！我好快就釣到四條鱒魚，第一條拎咗去燒嚟食，其餘則即時放生，全都有尺幾長㗎！
Pera
但係 Stanley 就好唔服氣，因為佢一條都釣唔到！午餐就係食鹿肉（好似羊肉！）、鱒魚同芝士，唔錯㗎！我哋食到勁飽，飽到連晚飯都可以唔食！
Pera
約三點左右就要回程，黃昏啦嘛，突然背囊一邊帶斷咗，死火！Anyway，都冇法子，都要照上路！
Pera
夜晚九點左右出咗去轉咗個圈，想睇吓有冇機會睇到北極光！雖則今日冇雲，但衰在氣溫唔夠低，上週都有零下三十度，今晚得零下七度，太暖了，真係有啲失望呢！不過 Stanley 已凍到手指腳趾都勁痛，所以我哋九點九左右就返回 Guesthouse，沖杯熱朱古力飲！好了，到我要去沖涼了！聽日要趕六點九火車去 Kemi 呢！仲有，今晚發現，新買嘅相機 Remote Cord 唔見咗，想必昨晚上山時唔知跌咗喺邊，有啲唔開心呢！
Kemi
為咗睇北極光，我每半粒鐘醒一次望窗，都咪話唔辛苦，亦好有恆心呢！可惜始終都係睇唔到！今日晨咁早5:45就要行去火車站，趕晨早車係好辛苦嘅事，完全係未訓醒狀態就上黑蚊蚊嘅路！
Kemi
去到 Kemi 先仲係八點，天仍係好黑，等到九點先行去市中心，呢度比 Rovaniemi 更凍，行到市中心時手腳都凍到勁痛，於是我哋去 Information Center⋯⋯避寒！
Snowcastle / Kemi
哈哈！跟住我哋去咗附近嘅冰酒店 Snowcastle，呢度除咗過夜特別外，都冇乜睇頭。
Snowcastle / Kemi
喺 Snowcastle 入面見到一個好唔掂、lei fe” 到死嘅香港人，佢走過嚟問我哋係咪會去破冰船，由於碼頭都幾遠，所以我哋就夾錢一齊坐的士去碼頭。
Kemi
到海中心時，風景真係唔錯，真係好有北極Feel！
Kemi
加上難得天色不錯，而且還有機會落浮冰游一游水，其實水比空氣還要暖呢！
Kemi
今天見到不少中國人，有兩個中個女生，Le Fei” 及一對香港夫妻，和兩個台灣女仔，看來，北極也不是怎樣遙不可及呢！
Ounasvaara
大年初一，我哋去咗 Ounasvaara 學玩 Cross Country Ski。
Ounasvaara
上斜平路我都覺得幾用力，但落斜就 Ya...Hooo！好過癮！今日都係藍天，雪山樹林内好靚，感謝主！
Ounasvaara
我哋就係咁喺樹林中滑雪！滑雪後就返到市中心的 Arktikum 北極館，嗰度其實都算多嘢睇，但或者我太攰了，亦唔係博物館迷⋯⋯
Ounasvaara
之後⋯⋯發覺全市嘅餐廳除咗麥記外都休息，於是乎又捱咗個 Big Mac 餐，兩個餐又盛惠112蚊港紙！
Ounasvaara
由於天氣報告話之後幾日都係陰天有雪，於是諗咗好耐，都係唔再北上唔等北極光了⋯⋯免得白等。所以我哋就返 Guesthouse 拎背囊，改坐火車去 Helsinki，即向南行！
Rauma
在火車上，六點多就醒咗，因為火車預定七點正到達 Helsinki，我又臨時改行程，因為横掂之後又要晨咁早趕火車，倒不如先將行李寄存喺車站，先去下一個目城市。
Rauma
就咁，我就立即睇 Lonely Planet 及火車時間表，計劃去一個古城，叫 Rauma，是列入 UNCESO 的一個城市，跟羅馬尼亞的 Sighisoara 一檬，係整個城都列入 UNCESO 的！由於上帝帶領，我哋唔小心早咗一個站落車！令我哋反而有更多時間坐回頭車去 Rauma。
Rauma
由於喺 Tampere 有十五分鐘時間轉車，我哋立即搵咗一間車站附近嘅小旅館，Check In 租一晚，放低大背囊又跑返車站趕火車，勁呀！好快我哋就上佐 Regional Train 去 Kokemaki 轉巴士去 Rauma。
Rauma
可惜，今日天氣唔係太好，全日都係陰天，仲有一陣雪呢！所以，我都冇乜心情去影相行 Rauma。Anyway，舊城區亦唔係想像中的舊，有陽光時必定好靚的。另外，我發現家家戶戶都在窗下放上半段喱士花邊布和很多擺設呢！
Tampere
今日八點幾起身，發覺腰酸背痛，事關張帆布床真係唔係咁好瞓，於是起身做一做熱身！哈！
Tampere
然後，我哋就跟住旅遊局嘅 Walking Tour Guidebook 去行下 Tampere 市，市中心大多建築都係用紅磚做外牆，周圍有唔少煙囪，好有工業城市嘅味道！
Tampere
十點零鐘我哋就去咗姆明博物館，入面有好多姆明首辦場境，而且係跟據原著故事內容去做，好靚㗎！另外，牆上貼滿原著手稿漫畫。可惜呢度唔可以影相，走時想買一套姆明木公仔，但係要成五百蚊港紙！好貴，而且⋯⋯香港好似能買到又平又靚過佢嘅，所以最後都冇買到嘢。
Häme Castle / Hämeenlinna
中午已完成我哋嘅 Walking Tour，本先係計劃返去 Helsinki，但突然諗到可以去另一個鎮 Hämeenlinna，參觀嗰度出名嘅 Häme Castle 。
Häme Castle / Hämeenlinna
但係去到時我哋發覺嗰度平平無奇，而且亦冇人理我地出入，索性連入場費都慳返！由於沒甚睇頭，於是我哋慢慢從城堡沿河邊行返去火車站，河邊的境色反而重有睇頭，但天太多雲太白了⋯⋯
Helsinki
五點半已到達 Helsinki，天已黑晒，似係七八點左右，好快就買咗張 5 Days Pass 交通証，然後坐電車去那間已 Book 咗嘅 Hostel，叫 EUROHOSTEL，是 HI 的，但亦係我見最有系統管理的 HI Hostel，就好似一間小酒店咁。不過，呢度樣樣都要收費，洗衣粉都要買，唔似一般 Hostel 咁！所以，呢度除咗係近電車站方便、有 Microwave 同免費享用 Sauna 外，一啲 Hostel 嘅親切感都冇！入夜後嘅 Helsinki，雖則我指嘅係六七點左右，但都好似香港嘅十點了，一片死寂，反而香港呢個時間仲繁華呢！
Savonlinna
今早坐咗六點三十五分嘅火車，向東北進發，去 Lakeland 湖區嘅 Savonlinna。沿途發現，雪越來越厚，氣溫跌到去-17度，仲以為湖區會暖啲！
Savonlinna
全市凍得交關，影都布一隻，地上啲雪又乾又白又厚，腳步聲同雪磨擦嘅聲音更加係刺耳呢！好快，手腳都凍到痛，幸好今日有陽光同少少藍天，睇落去 Olavinlinna Castle 比之前嘅 Castles 都要靚，天氣好真係乜都唔同！
Savonlinna
但，或者係寒冬，根本都冇乜人，不過我都影咗唔少相，而阿來則又喺道玩雪！
Savonlinna
中午我哋去咗一間餐廳食飯，佢叫咗燒魚，我就叫咗鮮奶油煮牛肉，食到我哋好飽好飽。
Savonlinna
但由於回程火車係六點半，我哋又唔好意思喺餐廳坐咁耐，就去咗公共圖書館上網，寫下日記，打發下時間。(回程火車開六點半，返到 Helsinki 都已經係十一點五十分！）
Savonlinna
臨瞓前，阿來突然同我講生日快樂，之後就將兩幫人的生日咭同生日禮物交俾我，好 Surprise 好開心呢！同一時間亦收到 C Big 嘅 SMS，佢真係有心，而佢送俾我嘅禮物係冷帽！Yeah，好靚㗎，明天又有新帽戴了！
Suomenlinna
今日好凍，喺市區亦都係只有-15度左右，食完早餐本想去 Hostel 嘅 Sauna，但覺得嗰度平平無奇，為免嘥時間，所以都係決定唔去了。
Suomenlinna
離開 Hostel，嗱嗱林走去碼頭，坐船去 Suomenlinna，架船喺碎冰海面航行，十五分鐘就到了。
Suomenlinna
Suomenlinna 亦係納入 Unesco 㗎，以前呢度係軍事要塞，但由於今日太多雪啦，所以根本冇靚景，感覺上只係一個被城牆圍住嘅地方，而且喺城内又影唔到全景，所以都唔覺去咗要塞呢！
Suomenlinna
加上，呢度真係好凍，手腳都凍到疆晒，拎部相機出嚟，影三四張相就又要收入肚皮焗返暖佢，影相時隻手更係凍/痛到死，完全頂唔順！
Helsinki
所以中午前喺島上兜咗個圈就就坐船返 Helsinki 了！返到 Helsinki，立即去超市買叮飯、薄餅同肉丸返 Hostel 食。
Sebilius / Helsinki
下畫休息佐一陣就去 Sebilius 公園行下，嗰度凍到死！而且公園又冇乜嘢睇，都唔明點解呢度係遊行團必到的景點！影咗三兩張戴咗新帽嘅相，就去坐 3T Tram 遊咗市中心一圈，但實情係我哋兩個都喺電車上瞓著咗，仲要瞓到成身凍晒，鞋入面嘅鞋墊都結咗冰，唉！仲以為電車一定有暖氣。
Temppeliaukio / Helsinki
坐完車，去咗 Temppeliaukio 岩石教堂行下，外面乜都睇唔到，因為教會係喺地下面㗎，入面就好靚囉！好彩今日帶佐28mm嘅廣角鏡，先可以影到相咋。
Helsinki
出嚟時天色已經開始黑了，我哋決定搵家食芬蘭菜嘅餐廳，慶祝我哋彼此嘅生日，原本我哋係想去市中心嘅 Zetor，但一份餐要四百幾港紙⋯⋯太貴了。
Helsinki
於是我哋去咗另一個港口嘅餐廳，食咗個傳統芬蘭餐。雖然唔係話真係一啲好吸引嘅菜色，但呢度好 Homestyle，好有特色，而且都總算係試過芬蘭菜吖！
Porvoo
尾二嘅一日，係大藍天，感謝主啊！我哋食完早餐就去坐長途大巴到 Porvoo，兩個人身上只係剩餘30歐羅，但去程巴士已用咗18歐羅了！好彩回程可以用 Credit Card 咋！上次去 Rauma 天氣不好，今日補數，因為都係睇傳統的木屋仔的。
Porvoo
藍天之下，景色真係好靚，所有屋都好 Colourful，好 Sharp！心情特別好呢！但今日都仲係好凍，仲發現我嘅羽絨好似甩咗好多羽毛，腰位入風，唯有彎住身行！因為係凍到非常痛㗎！
Porvoo
Porvoo Old Town 不大，一個小時已行完，見有時間同大藍天，就決定立即回 Helsinki，再坐火車去 Turku！
Turku
到達 Turku，天仍有點藍，但已開始日落，所以好快咁跑去 Cathedral、河邊影吓相，再坐巴士去 Turku Castle。
Turku Castle / Turku
但天色暗得好快，好在及時咋。
Turku Castle / Turku
之後我哋沿路行返去市中心，去 Pizzaria 食薄餅。
Turku Castle / Turku
沿途都好凍，阿來話雙腳都已疆咗，前幾日先至好暖，今日一下子又跌到-15度，地下的積水、冰同泥都被雪重新蓋過晒。
Turku
好了，在芬蘭最後的一晚，我哋喺 Turku 火車站等咗成粒鐘先有車。哈！有對情侶喺度冷戰中，讓我諗起上次去羅馬尼亞亦見到情侶講數。喺火車途中，我一直都望著窗外，希望可以見到極光，因為今晚萬里無雲呀！慢慢地，我發現了⋯⋯我條頸梗咗！
Helsinki
感謝主一直保守至今，亦喺最後一日都送咗個萬里晴空俾我哋！藍天總叫人開朗，但已經係今次旅行嘅最後一日了！起身後去佐 Hostel 嘅 Sauna 房焗一焗，細細間房入面，坐住四隻鬼，唯有照迫入去囉，咩呀！怕你咩！喺嚴寒的日子焗 Sauna，感覺份外舒服！食過早餐，我哋先去 Check Out，以及寄存行李，目標喺兩點半前去埋未到嘅地方及去到巴士站等坐巴士去機場。
Helsinki Cathedral / Helsinki
星期日嘅朝早，路上嘅車少咗，影相方便好多，但等車時間亦長咗，喺-18度嘅氣溫下等車，真係無風尤自可，有一啲風都叫你刺骨呀！
Helsinki
沿途真係好凍，面部都凍到紅晒，Vibram 底嘅鞋鞋底同鞋墊都結咗冰，腳趾當然係勁痛啦，仲駛講。唯有喺鞋中“屈”起腳趾行，免得腳趾貼住冰墊行，否則唔痛死至奇！
Helsinki
平日都唔乜見嘅芬蘭國旗，今日喺街頭到街尾都被掛起咗，但路上嘅商舖就好多都休息，路上好少人行！想必芬蘭人都喺度諗，我哋係咪傻佬，點解連星期日都唔喺被窩入面瞓晏啲！
Helsinki
兩點三，我哋已從Hostel 拎返行李到達中央巴士站等 615 了！等咗十五分鐘，鞋內嘅鞋塾又結冰，今次冇風都結冰，真攞命 ！巴士大致上都係沿嚟時嘅路線走，但嚟時我對路面環境好陌生，家下則好似好熟悉咁！By the way，Finland，再見了！
Kemi
喺飛機上，睇住外面嘅一點點城市的街燈，樣樣野都好似積木咁，令我諗返喺細個嗰陣喺茶菓嶺釣夜魚，坐喺海邊望住一架架飛機從啟德向鯉魚門方向起飛。嗰時我猜想客機入面有過百人，入面一定好嘈；而我就四周一片寧靜。依家下我則就係坐喺機廂中，在不斷的飛機引擎聲同冷氣機聲下，望住外邊寧靜嘅地方！哈，這種回想同感覺好得意呢！喺飛機上，突然想到不如下次去牙買加吧！嘻！
Kemi
鳴謝：
首先當然要多謝陪我去嘅阿來啦！另在旅途中，收到以下的 SMS，多謝各位！
SMS from 波波：親愛的黑仔，祝你生日快樂，主恩常伴！
SMS from Stephen ：祝生日快樂！身體健康；
Kemi
SMS from 虎：起身啦，壽星公！早早早晨！恭喜你榮登三十寶座呀！快啲望下出面個天，睇怕都係大白天啦！祝你生日快樂！老如松柏！希望你個心境成日都係大藍天啦！唔駛掛住我哋！我哋就嚟唔記得你㗎啦！你哋玩得開心喲啦！Happy Birthday to Stanley and U 呀 ！
Kemi
SMS from Amy ：黑：生日快樂呀！祝你乜好呢？！大個仔啦，希望你快點搵到個真係同你去一世旅行的人啦！今朝的 message 已收到，我以為鬧鐘響呀！
SMS from 盧慧燕：生日快樂！願主光照您，愛護您！恩典一生追隨您。
Kemi
SMS from B: Happy Birthday！Wish U good health & all the best.
SMS from C Big : Hi Darkie, are u going to sleep ? Just wanna tell u today is a very special day, coz three of my friends were born on the same day！Happy Birthday！
