Parliament / Bucharest
佢係咪會用另一本護照再飛返嚟呢？今次嘅旅程都幾難忘，有個咁特別嘅開始，希望最終我哋都可以三人行啦！起初有啲擔心自己坐10幾個鐘頭飛機會好辛苦，唔知做咩好，點知今次好好瞓，瞓醒就食，食完又瞓，感謝神！
Bucharest
到左羅馬尼亞機場，唔知係咪因為 Passport 張相個樣唔似我，差啲入唔到境，要見好多人，個個叫我望住佢⋯⋯笑，比晒所有身份証明文件佢地睇，最後要檢查晒所有行李，搞咗個幾鐘先入到境。黑仔喺機場出面等我，差啲要報警咁濟，因為我個電話原來係無漫遊，佢地又聯絡唔倒我，嚇鬼死佢，好彩最後都平安到達。跟住我地搭巴士返 Hostel，黑仔不停講佢做過喲咩，點樣跑嚟接我，有幾擔心我哋。
Bucharest
我哋返到 Hostel Casa，沖個涼，上咗一陣網，6點幾就離開 Hostel，呢間 Hostel都幾乾淨吖。然後買火車票去下一站 Timișoara，沿路去火車站同埋買飛嘅時候，黑仔不停叫我要小心啲小心啲，感覺真係好似好危險咁。宜家我地喺火車站側邊一間叫 Coffee Right 嘅快餐店食咗個麭，等緊11:00p.m火車，呢度啲二手煙真係好勁。
Bucharest
小魚宜家喺 London 表哥屋企住，要等到假期後，即係29號去做簽證，先知幾時可以過到黎。如果小魚自己一個人嚟，要轉飛機再轉火車，好危險。但若果叫佢唔好嚟，我哋大家都唔想。小魚宜家好唔開心，而我同黑仔兩個亦都好悶，點解呢個旅程會咁嘅？
Timisoara
坐咗8個鐘頭火車，今朝7:30嚟到 Timișoara，坐通宵火車嘅感覺好嘈，有啲驚，因為要攬住啲重要財物瞓，仲有因為係坐位，無得瞓低，都幾辛苦，好彩我哋兩個人坐三個人位，比起對面果三個人已經好好多。開頭瞓覺覺得好凍，後尾開咗暖氣就好好多。我哋同一家三口一個車廂，感覺安全啲。
Timisoara
出咗火車站，見到個鐘快咗一個鐘，但無理佢。唔駛三分鐘就搵到我哋落腳嘅地方 Hotel Nord，黑仔話似修道院，我覺得都幾好吖。跟住落咗樓下間快餐廳食嘢，我食咗個漢堡，黑仔食咗個好難食嘅庵列，又係快餐啦！點解呢度啲人食極都唔厭。
Timisoara
食完嘢，出面落微微雨，我哋返吃 Hostel 小休1小時，瞓醒見到無落雨，就出發去市中心嘅廣場。沿途好多好靚又舊舊地嘅建篥物，黑仔話似俄羅斯。廣場嘅時鐘唔知點解都係怏咗一個鍾我哋開始懷疑同 Bucharest 有時差？
Timisoara
宜家我坐喺一個廣場，希望等一陣有太陽，可以影多啲靚相。呢度有好多白鴿，好多一家大細喺度坐，好簡單好平淡嘅生活。我諗黑仔一定覺得好悶，小魚又唔喺度，我同佢又無咩話題。希望30號可以 Meet 到小魚啦，唔係黑仔實悶死。
Timisoara
宜家我地坐緊火車去另一個城市 Cluj，又坐7個鐘頭既火車，今日架火車靚好多，好乾淨，仲有音樂聽。靚過香港既火車。沿途都係農地、有羊、好高嘅樹、高速公路，宜家好舒服。
Timisoara
返房無咩野做，黑仔。係度剪手甲，真係攪鬼，從來都未見過啲人咁樣剪手甲，唔駛睇，靠感覺，唔駛一分鐘就剪晒，好似表演咁，係咪癩架！
Timisoara
過多一陣，太陽出來了，拿拿臨走落街，買完火車飛就去市中心廣場影相，點知去到個天又陰晒，有啲無奈。不過其實無落兩，已經好感恩。
Timisoara
之後我哋坐喺麥當奴露天茶座飲嘢，諗住等天黑，果時大概係下午5:00，等到6點幾，個天一啲都無黑過，但係就越來越凍，唯有起身四圍行下啦。兜來兜去，點解我都係唔認得路！行下行下，又行返去果個好 Colorful 既廣場 United Square。坐左好耐，黑仔望住果座佢話好有特式嘅建築物，佢話成日去旅行都會望住一個畫面，然後將嗰個時刻 Lock 住喺個腦裡面，記住係幾時，喺邊度，見到啲咩，嗰時諗緊啲咩，叫我試下。我就記住咗嗰個時間地點，我望住一幢怪怪嘅建築物，身邊有好多小朋友，好多白鴿，有個水池仔噴水出嚟，啲水好多人去飲，有座教堂打鐘，足足響咗6分鐘，我諗緊，點解7點幾個天都唔黑，8點鐘個天黑末？個背囊點可以 Pack 得細啲？呢個旅程會唔會只得我同黑仔？小魚喺度做緊咩？
Timisoara
坐左一個鐘，又開始覺得凍，再繼續四圍行下，嗰時已經7點幾，個天仲好光，我哋考慮係咪繼續等⋯⋯還是繼續。我哋行返去最遠嗰個廣場嘅教堂，諗住入去坐下，點知已經閂門唔比入，我哋喺門口企咗一陣，嗰度好大風。等到8:10p.m.，終於開始黑唎！我哋走返去廣場影夜景，總算冇白等。黑仔話好多時佢去旅行都會係咁，等天黑，一個景點去兩次。之後，我哋坐毛毛蟲巴士返 Hostel，去返下畫食晏嗰間快餐店食嘢，個 Waiter 都認得我哋，我哋坐同一個位，叫一樣嘅食物，只係掉轉個湯飲，之後就返 Hostel 沖涼，結數，瞓覺喇 ！餘下嘅旅程，仲有好多未知数，突然間覺得如果呢個係一個走唔完嘅旅程都幾好玩，唔知小魚係咪真係可以順利去到 Cluj 搵我哋呢？
Cluj Napoca
到咗 Cluj 係朝早10點幾，一落火車，見到火車站幾靚，行出車站，見到啲建築物同埋太陽，唔知點解感覺好興奮。我哋搭咗兩個站巴士，好容易就搵到呢間一早喺香港已經 Book 咗哪 Retro Hostel ，呢度個 Reception 姐姐好友善，好 Helpful，我好鍾意呢度。姐姐沖咗兩杯咖啡同一藍餅乾仔比我哋，可能因為肚餓，覺得好好味，我平時都唔飲咖啡都覺得好好飲。
Cluj Napoca
之後叫小魚打電話嚟 Hostel，終於聽到佢把聲喇，嗰一刻真係好想好想小魚即刻出現喺我眼前，有好多嘢想同佢講。宜家只有一個方案，就係小魚由 London 搭飛機去 Bucharest，然後轉車去火車站，再轉火車嚟搵我地，都幾危險，好擔心。但一切都要等佢收到 Passport 再打算。
Cluj Napoca
跟住我哋去食嘢，係 Hostel 姐姐介紹既一間羅馬尼亞餐廳，佢仲介紹埋有啲咩好食，寫埋價錢。間餐廳好靚，啲嘢食都好好味，好豐富，但份量太多啦！食到好飽好飽，但係都食唔晒。呢餐係到現時為止最貴嘅一餐，成為港幣128，正！
Cluj Napoca
之後我哋去市中心 St. Michael Church 附近影相，呢個城市唔算好大，啲路都幾易認，雖然我都係唔認得。行完市中心，我哋上咗個小山，上面有個十字架，有間 Hotel，嗰度可以睇晒成個城市嘅風景，喺山上坐咗一陣，好舒服。由於下午嗰餐咁豐富，夜晚嗰餐決定慳啲，買螺絲粉返嚟煮，兩個人都係20幾蚊咋。呢度個廚房好靚，自己煮嘢食幾好玩。入到廚房，我樣樣都好似論論盡盡咁，切午餐肉切到勁厚，煲水唔識用水煲，黑仔都唔知好嬲定好笑，佢話估唔到我唔識煮嘢食。最後都係黑仔整啦！都幾好味吖。黑仔已經瞓咗喇！我覺得佢都幾叻㗎喎。
Cluj Napoca
今朝7點一起身，睇到小魚嘅短訊，佢話決定唔嚟喇！佢聽日會飛去愛爾蘭搵個朋友，我地瞓喺張床度都唔知講咩好，淨係知道小魚一定係好傷心。
Turda
跟住我哋繼續行程，出發去 Turda，嗰度有個鹽礦。我哋去到街上面，有人問我哋係咪搭的士，唔知佢講咩，但係黑仔竟然同佢溝通到，原來呢架係泥鯭的。去到礦場，一條好長好長嘅大坑渠咁，四圍都係鹽，加上黃黄嘅燈光，好似探險咁，嗰度影出嚟嘅相好靚㗎，我幫黑仔用佢個相機影相，又要扭、又要用腳架、又要閉氣，好鬼難，影完佢最鐘意答我是旦啦、OK啦。
Turda
行完條大坑渠，估唔到裡面有更大更大嘅礦洞，我諗有10幾層樓高，喺上面的木板行，其實我好鬼驚。洞裡面有人野餐、睇書、踢波、打乒乓波，好攪嘢㗎！我哋都係第一次去礦場，裡面都幾凍。黑仔話呢度可能係成個旅程中最大嘅收獲。
Turda
之後本來想去 Turda 再入嘅一個小鎮，可惜搵唔到車搭，唯有搵車返去市中心。行行下，我哋走咗上一個小山丘，沿途有羊、有馬車、有雞犬不寧、有好大片嘅草地。望到好多屋仔，山下面有個湖，又係一個好靚好舒服嘅地方，只係差少少太陽。之後我地搵車搭返去 Cluj 市中心，有個細路一路跟住我哋，不停同我哋講嘢，態度唔係咁好，佢跟住我哋好耐，都唔知點應付佢，唯有唔理佢，最後去到巴士站附近佢終於轉移目標喇！我哋又係釣泥鯭返去，車都未開，發現⋯⋯太陽竟然出來了，仲要好曬添，好彩太陽陪住我哋返到去市中心，又可以補多幾張靚相。果時都仲未決定今晚係咪留喺Cluj。
Cluj Napoca
今日下畫我哋去咗一間 Fast Food Shop食漢堡麭，意想不到咁好食，麭裡面有生菜、肉、薯條、雜菜⋯⋯總之好好味啦！都只不過係8蚊咋，好抵。想趕兩點幾火車去下一個城市，但因為趕唔切，最後我哋決定喺呢度留多一晚。
Cluj Napoca
下畫3點幾，我哋去咗騎馬。喲馬好大隻，行埋去都幾驚。嗰個農場仲有好多鵝，黑仔成日話佢哋鵝、鵝、鵝咁叫好得意好得意，我見到佢覺得佢仲得意呀！傻傻地咁 ！第一次騎馬都唔知點上馬，好高呀！好夾硬先上到，坐喺上面成日好似就跌就跌咁，坐得唔係好舒服，不過黑仔話女仔騎馬已經係舒服好多喇。馬夫拉住我隻馬喺山頭散步，黑仔喺後面自己一邊騎一邊影相，我諗如果唔係我想試吓騎馬，黑仔都唔會嚟。騎馬嘅時候無咩太陽，騎完準備走嘅時候又有喇！激死！
St Michael Church / Cluj Napoca
騎完馬，去咗 Supermarket 買螺絲粉，買完見到好曬嘅太陽，黑仔突然話上山喇！於是就馬上返 Hostel 放低啲嘢，急急腳走上山。可惜，上到山上太陽又不見了，無辦法唯有返 Hostel 煮嘢食。今晚都係食茄汁螺絲粉，午餐肉，多左罐牛腩罐頭，啲午餐肉今次切得薄好多喇！全部都係我煮㗎 ！用返黑仔嗰種好懶嘅方法，唔知點解兩個人用會咗咁多隻碟同煲。黑仔話幾好味，我就話好得！仲 Send 咗訊息話埋俾小魚知。
St Michael Church / Cluj Napoca
食飽飽準備洗碗嘅時候，黑仔突然叫：「阿鳳！」我以為發生咩事，佢話個天藍晒呀 ！我出門口望望，果然⋯⋯即刻掉低手頭所有嘢，碗都唔洗，兩個嗱嗱臨跑上山。嗰刻覺得好有目標，好似充滿力量咁。一路跑發覺藍天越來越少，跑到上山已經唔藍喇，好失望，但係都影幾張啦 ！我哋喺山上坐咗一陣，望住 Cluj Napoca 呢個城市，唔知點解有少少感觸，我嘗試 Lock 住呢個情景。
Cluj Napoca
越坐越凍，我哋慢慢行返 Hostel，黑仔話跑到頭先啲螺絲粉都無晒。呢條路已經行咗好多次！呢次真係最後一次啦！頭先10點我哋又開餐，整甜品食，係粟米粉糊仔，呢度啲人加芝士、鹽⋯用嚟當飯食，係鹹嘅。我哋就用糖水煮，變佐甜品。我開頭用熱水沖，啲粒粒搞極都唔溶，後尾倒晒佢，黑仔話再用熱水煮，一路煮一路搞，今次成功喇！又幾好味喎！跟住黑仔仲去洗煲，沖茶。幾好！黑仔又瞓左喇！聽朝要趕05:24分火車，早哟瞓先 ！
Cluj Napoca
今朝 4:00am 起身離開 Retro Hostel，到宜家為止，呢間係最好嘅一間。早上5點喺火車站等 5:24am 火車去 Sighisoara，有哟肚餓，買咗包脆麵包。上到火車，都係舊舊哋嗰隻，6個人一個車廂，今次滿座，我瞓足全程，因為好攰。黑仔真係好勁，無論搭火車、巴士、的士、行路或者去到一個新嘅城市，都好清楚自己嘅位置，好有方向感。
Sighisoara
落火車有啲凍，我哋搭的士嚟到 Burg Hostel，黑仔話呢間 Hostel 係直頭喺聯合國遺跡 (UNESCO) 裡面，但都係虛有其名，Hostel 裡面好簡陋，幾污糟，咩都無，好似裝修緊嘅一個單位。朝早8點幾，放低晒啲行李食埋包餅就出去行個圈，呢個城市好細，比較凍，可能因為落完雨，天陰陰，街上面感覺好冷清。呢個城市係列入聯合國遺跡 (UNESCO) 之一，啲建築物都好靚，又有一個好 Colorful 嘅廣場仔，仲好近 Hostel 添。
Biertan
我哋諗住搵間 Bed & Breakfast 嘅 Hostel，問下去邊樹玩，但係嗰個地址已經唔係 Hostel，唔知點算好，無咩心機走返 Hostel，之後我哋決定搭的士離開呢個小鎮，去 Biertan，嗰度有間 Church，都係聯合國遺跡 (UNESCO) 之一。
Biertan
上咗的士無耐，勁好太陽，黑仔話個天好陰濕，總係呢啲時間就出太陽。好彩去到間 Church 都有陽光，感謝主！我哋喺 Church 附近行見到有幾個細路仔喺度踼波，同佢哋影咗張相，最衰無帶啲糖出嚟啦！
Biertan
跟住我哋行上個 Church，一條長長嘅木樓梯，上到去有個 Church，不過入唔到去。上面望出去見到好多小屋仔，有啲煙囪冒緊煙。我哋走嚟走去捕個太陽出嚟，但係都唔係幾陽光，影完諗住走，落到馬路又出太陽，又比佢陰到喇。於是再嚟一次，踏上嗰條長長嘅木梯，上去補多幾張。雖然成日要走來走去先捕到藍天、陽光，但係又幾好玩。返落去的士，司機瞓緊覺，上車望一望，發現原來頭先停車等候嘅個半鐘係計錢嘅，等咗60蚊，呢一程都幾貴，用咗港幣280。
Sighisoara
返到小鎮，有太陽，四周圍嘅感覺都唔同晒，有返啲朝氣，我哋抓緊時間去影相，走咗上去 Clock Tower，影晒個鎮嘅四周，不過走上走落都幾攰。到下畫4點幾先搵嘢食，我已經好肚餓，成日走來走去只係今朝食咗幾塊餅，加上有啲頭痛，成個人無晒心機，黑仔都話好攰。
Sighisoara
妤唔容易先搵到一間食 Pizza 嘅食店坐低，打開 Menu，係英文㗎！裡面嘅 Waitress 仲係美女添，我哋一人半個 Pizza，一個菜沙津，一大碗湯 Share，仲有麵包。估唔到個沙津就係全碟切碎晒嘅椰菜咁簡單。
Sighisoara
食完嘢返 Hostel 叉電，再出去買水買小食，因為今日晏食嘢，唔肚餓，所以夜晚只係買兩條蕉同埋一包脆麵包，買完嘢我哋仲一人整一個雪糕添。再返 Hostel 坐一陣，聽下歌仔，8點多，天黑了，出去影夜景但呢樹無咩好影。今日都算好好天氣，不過有啲悶啦，因為呢個鎮真係好細，一陣就已經行完，可能大家都攰，所以都比較靜。今晚又要早啲抖喇，聽朝要趕5點幾火車去 Siubu，晚晚都話要早哟瞓，早啲又早啲。旅程倒數仲有4日半，我開始唔捨得，時間過得好快。
Sighisoara
今朝4點幾就到咗 Sighisoara 火車站準備去 Siubu，去到車站都未有飛賣，要等15分鐘先有，晨咁早喺個窿裡面呆等，都幾凍！買完飛再去另一個透明房等上車，有間房暖好多。5:22am上火車，坐半個鐘去 Medias，等一個鐘再轉去 Siubu，今朝只得3度咋！去到轉車站，好凍！買咗兩杯熱嘅 Cappuccino 同一包威化餅喺火車站食，有啲小朋友伸手問我哋，黑仔比咗兩件餅佢哋，點知跟住成班大人圍埋嚟問我哋要錢，我哋即刻走去啲人流多哟嘅地方，本來想臨上火車放低包糖比小朋友，但係趕唔切。今朝黑仔都幾多嘢講喎，講關於旅行嘅嘢佢就成個精神晒。
Siubu
朝早8點幾去到 Siubu，住喺 Hotel Podul Minciunilor，呢間房好大，係三人房，幾靚，成個城市其實都好靚，可惜市中心一個大廣場同埋啲教堂正在修葺翻新，掘爛晒啲地方，好似成個大地盤咁。不過可以想像到佢攪掂之後一定會好靚。我哋喺 Hotel 小休一陣，一醒咗見到太陽就即刻搽防晒然後走出去，宜家我哋有經驗，知道呢個地方要10點幾打後先有機會見到陽光，夜晚就8點多先開始天黑，我哋嘅行程就容易啲控制。
Siubu
雖然好好太陽，但影得嘅嘢唔多，避開個爛地影都幾靚嘅。之後我哋去一間叫 Simba 嘅快餐店食嘢，一個餐有豬/雞、薯條、雜菜沙津，廿幾蚊一份，幾好味，係啲雜菜沙津酸啲。由於今日實在幾凍，我哋食完嘢行啦一陣就搵咗間小店坐低，飲杯熱朱古力暖一暖，影張相偷影埋隔離個婆婆，之後行咗一陣，我哋喺街買咗啲類似沙翁嘅物體食。今朝一出嚟我已經發覺街上面好多人食，已經好想食，我試咗朱古力味，黑仔試雲尼拿，味道就係朱古力沙翁囉，但都幾多油。
Siubu
今日我哋去咗一間東正教教堂，見到有個婆婆喺裡面問人要錢，覺得佢好慘，黑仔此咗 20,000lei 佢，呢度啲人好得意，每次經過教堂都會點點點點，入到教堂又會點點點點然後親一親啲畫像，男女老幼都係咁，好似好誠心咁。
Siubu
之後我地行去城牆附近坐一陣，考慮好唔好退房去下一個城市，最後決定去一個動物園走走，喺火車站搭T1巴士去，去之前又去左間 Fast Food Shop 飲熱朱，呢杯已經係第三杯。落車之後要行十幾分鐘先去到動物園入口，沿途有條火車路軌好長，我地走上路軌行，一直以為條路軌係荒廢既，點知走嘅時候竟然見到有火車行。
Siubu
人到動物園，見到的動物好慘。鎖往晒，簡直好似鎖住喺一個地獄咁。嗰度環境亦唔算靚，臭臭地，有個好大嘅湖可以舒舒服服行一陣，總好過喺巿中心唔知去邊。之後返市中心行一陣就返 Hotel，因為實在太大風唔可以暴露喺室外太耐。返 Hotel 小休到7點，出去補兩張相再去返下畫嗰間 Simba 食嘢，今次叫咗個美味沙津、兩串唔知咩肉、麵飽、薄餅仔，仲有兩杯熱朱，今日足足飲咗4杯，死未！
Siubu
返到嚟 Hotel，睇返黑仔以前去旅行啲相，好多，好靚，好想去呀！佢都好有心機 File 晒啲相，好羨慕佢去過咁多地方，有咁多經歷，希望今次嘅旅程係我生命裡面嘅一個開始。旅程仲有3日半，黑仔話聽日想租車，因為仲有好多個地方想去，希望聽日有好天氣啦。佢叫我記得祈禱。主呀，求主保守我哋三個人喺旅程餘下嘅時間都有平安，行程順利，有歡樂， 有得著，感謝主！阿門！
Brasov
今朝 5:00 起身，搭6點幾火車去 Brasov，今朝好凍呀 ！一落火車即刻買兩杯熱朱。出咗火車站，正在考慮搭巴士定的士去 Hostel，有個男人問我哋係咪搵地方，比啲單張我哋睇，都 OK，8 Euro一個人一晚，是旦啦就跟佢上車，佢架車都幾舊下，原路見到好多屋頂都舖咗雪，仲見到有 Brasov 個字喺雪山上面，好型！呢間 Hostel 叫 Roling Stone，間屋好大，房門打開，一間大房有10幾個床位，我哋就要咗間6人房，好好彩，無其他人住，我哋霸晒成間房，放低晒啲行李我哋上樓食早餐，一班唔識嘅外國人，坐埋一間屋，一張檯一齊食早餐，感覺有啲怪，我哋食烘多士，飲咖啡，我雞手鴨腳，都係黑仔整啦！呢間 Hostel 太多人喇，多到有啲唔習慣。
Bran Castle / Bran
之後我哋諗住自己搭車去德古拉古堡，一出門口，有個人問我哋去邊，原來有兩個芬蘭嘅女仔都係去嗰度，黑仔計過條數，決定 Join 埋佢哋一齊。去到古堡，個司機話有學生証入場會平啲，我同黑仔都無，果兩個芬蘭女仔搵啲唔知咩咭比我哋當學生証，又得喎。行上古堡嘅途中唔准影相，應該話影相要收錢，我見到啲雪真係好興奮，好靚呀！啲雪鋪喺啡色嘅樹幹上，好好睇，好想喺雪地上面亂跑亂跳，但係見佢哋個個都好平靜，黑仔叫我唔好咁樣，我唯有控制住自己嘅情緒。
Bran Castle / Bran
入到古堡，其實都無咩特別，就係屋一間，行埋啲會響音樂嘅。去到屋頂，望返落個山真係好靚，嗰兩個芬蘭女仔可能見慣，相都無咩點影。睇古堡只係用咗30分鐘左右就走喇！
Bran
出咗古堡，有好多精品賣，睇來睇去都睇唔啱，司機話呢度賣嘅嘢好貴，我唯一睇中一條頸巾，好似20蚊左右，但係黑仔話唔好買，頸巾 Stanley 公司大把。雖然我都幾鍾意，都係唔買啦！行番去架車嘅時候，唔小心扭親右腳，呢個位之前已經傷過幾次，初初真係好痛，幾驚落車行唔倒，心諗個旅程唔係咁就完呱！祈禱祈禱！好彩後尾無咩事，宜家隻腳腫左少少。
Rasnov
跟住我哋再去多一個地方叫 Rasnov，入去係要比錢嘅，但裡面真係無咩特別，唔知係睇厭咗定係相機無電定係扭親腳影響心情，不過今日好好天，影嘅相都好靚。
Brasov
下午1點，我哋已經返咗 Brasov 市中心，呢個城市大好多，廣場好靚，好新，Lonely Planet 話呢度係羅馬尼亞嘅布拉格。我哋跟住搵嘢食，呢度啲食店好似貴啲，無咩 Fast Food，餐廳就多，好遊客區。我哋去咗一間食 Pizza、意粉嘅舖頭食咗個法國麵包加熱朱，估唔到個法包夾扁嚟烘都幾好味，呢間食店好勁二手煙呀 ！
Poiana Brasov
食完嘢有啲肚痛，又有啲腳痛，喺廣場行咗一陣，無咩心機。黑仔話我“牛”晒，我嘅心情係點我個樣就會表現晒出嚟，呃唔到人。跟住我地決定上雪山喇！喺我搭飛機嚟嘅時候嗰個羅馬尼亞人介紹既。上到雪山，我開始失控，雪呀！好白好大遍既雪地，第一次見，第一次踏上雪地，好興奮呀！肚痛腳痛都無晒，真係好開心呀！影咗好多相，拎住個雪球好凍好凍，但係又唔捨得放手。其實我好想去滑雪㗎，不過我都驚隻腳唔得，算啦！下次先啦！
Poiana Brasov
之後我哋好勉強咁買咗一件手信比自己，係德古拉嘅牌一個。本來我都唔打算買，但係黑仔話唔鍾意都買一個，之後可能咩都賈唔到。咁就是旦啦！20蚊買咗一個。臨走又買熱朱飲，搭下畫5點巴士返市中心。行咗一陣就去買螺絲粉返 Hostel 煮，搵 Supermarket 搵咗好耐都無，求其喺間舖頭仔買啦，點知返到黎 Hostel 附近就鬼咁多間。我哋喺街上面，撞到今朝喺廣場問我哋係咪搵 Hostel 嘅婆婆，佢同個小朋友一齊，我哋去咗佢屋企睇過，約左聽朝9點鐘搬過去。我哋打算聽朝起身，執晒啲行李過去再出發去 Sinaia。婆婆屋企比呢度簡陋啲，但係我都想住多幾間唔同嘅地方，果度平啲，只係6 Euro一個人。
Brasov
今日夜晚我哋又煮茄汁螺絲粉食，點知買錯咗罐搽麵包嘅午餐肉，於是倒埋落啲湯裡面煮熟佢一齊食，點知杰到飛起，幾雞食 ！同我哋一齊喺廚房煮嘢食嗰個女仔可能呦晒頭。食嗰陣張檯附近有好多人，我哋好似若無其事咁食晒啲螺絲粉，好飽好飽。黑仔話好雞食，好似倒咗啲花生醬落去咁，呢餐係到現時為止最差嘅一餐。
Brasov
呢度 Hostel 有個女人好 Talkative 㗎，夜晚走入嚟我哋間房同黑仔傾計，教我哋去邊同應該點去，聽日搵唔到地方就返嚟呢度住⋯⋯等等。黑仔又建議佢房裡面可以放幾張椅，廁所可以放啲架⋯⋯黑仔頭先話我大食！其實我大食個個都知架啦！我覺得呢間房好凍，我已經蓋咗四張 Blankets，都仲震緊。仲有兩日半我哋就要返香港喇！
Sinaia Monastery / Sinaia
今朝喺 Hostel 瞓到8點先起身，係最晏嘅一日，然後上去食早餐，同檨係烘多士同咖啡，今日杯咖啡濃啲，好味好多！食完嘢我哋就 Check Out，執晒行李嚟呢間 B&B，咭片上面寫住 lleana Dascalu，喺正 Brasov 廣場裡面，非常方便。跟住我哋出發去 Sinaia，果度有修道院、Church，我哋喺火車站旁邊搵小巴搭上去，小巴要等多啲客先開車，呢程車都用咗好多時間。一落車覺得好凍，因為架車裡面好暖，而且我哋嘅位置好近雪山。
Peleș Castle / Sinaia
於是我哋又去買熱朱飲，都數唔到係第幾杯喇！今次有幾個外國女子幫我哋翻譯。行出門口唔夠2分鐘我就倒瀉朱古力！件衫粉藍色實在好顯眼，我知點解黑仔話去旅行唔好著咁淺色嘅衫喇！話時話，我發覺我啲外套都好污糟。沿路行上去都好靚，有雪架。首先見到一間修道院，之後再行入裡面有2間 Church，有雪地，有好多街邊檔，地下好多冰，好滑，有流水 ，有紅色黄色綠色嘅樹，一有藍天 ，有太陽，黑仔話影出嚟啲相好似迪士尼。有廁所，去一次要 2000lei，我哋買咗一塊芝麻餅食。
Peleș Castle / Sinaia
睇完我哋搭返小巴去 Brasov 火車站，再轉巴士返市中心, 好彩今次我哋係買 Ticket 打咗飛，如果好似今朝咁比錢個司機就麻煩，因為有人查飛，咁多日都係第一次見，有兩個人因為無買飛，同查飛嘅人喺車上面嘈咗好耐！黑仔留意到其中一個查飛嘅肥女人心口張相同真人差好遠，好笑！
The Black Church / Brasov
返到市中心，已經 3:15pm，第一時間搵嘢食，我哋買咗個夾餅坐喺廣場食，好似印度薄餅嘅皮，包着沙律、薯條、肉、粟米、雜菜⋯⋯ 非常好味！大概15港幣。食完嘢諗住坐 Cable Car 上雪山，點知去到冇得搭，唔知去邊度好，嗰時係四點，今朝婆婆話要6點先有人喺屋企，我哋喺廣場曬吓太 陽，黑仔喺度 Plan 行程，坐到5點幾， 諗住買意粉返去煮，黑仔話尋日我煮得太雞食，今日等佢煮。點知啲 Supermarket 好早就收檔，行咗幾間都冇開門，諗住返去先，晏啲再出嚟買下畫嗰個薄餅食，唔駛佢煮益咗佢添。
Brasov
返到 B&B 一陣，婆婆就叫我哋出嚟，跟住佢行到廚房⋯⋯實在太感動喇！婆婆竟然煮咗晚餐比我哋食，仲要係有飯食，已經好多日末食過飯喇！有條酸瓜、有隻蛋、仲有白酒添！好味呀！婆婆同我哋 Cheers，我哋就係咁影相。估唔到婆婆會為我哋預備晚餐，感謝神！
Brasov
食完飯出廣場行咗個圈，今日下畫冇去到邊，好似浪費咗半日，聽日就要揸緊時間喇！黑仔諗住再去多個城市，聽朝5點起身，第一站去徳古拉以前一直住嗰度。我哋會帶住啲行李行，之後先返去 Bucharest 搵 Hostel。聽晚係最後一晚喇！黑仔話今日間 B&B 張床係最舒服喎，快啲沖涼瞓覺先。
0
今朝早5點半起，趕巴士去第一個景點。尋晚瞓覺我覺得好凍呀，可能食得唔係好飽，起身摸吓個暖爐，凍嘅，開水喉啲水凍嘅，諗起尋晚真係惨，沖沖吓涼冇熱水，暖爐又唔熱，凍死人喇！我哋一起身，婆婆都跟住起身，沖咖啡比我哋飲，食咗兩塊餅乾就起程，我哋走之前送咗包糖比婆婆，話送比尋日個小朋友食嘅。落到街等唔到巴士，於是坐的士去火車站，再問人點樣搭車去景點。
0
巴士7點幾開車，沿途雪山嘅風景勁靚，我哋勁影相。我成日以為會喺雪地落車，結果都唔係。坐咗好耐好耐，中途要補錢再買多程車飛，到11點幾終於到站，其間有個外國女仔幫我哋翻譯，同我哋去轉車，截的士，同的士司機講我哋無錢要先載我地去換錢先再去轉車站⋯⋯真係感激佢。黑仔落車換錢，我喺的士裡面等佢，佢叫我唔好閂門，費事司機開車，幾醒。
0
我哋去到火車站，先知道原來無車去我哋想去的地方，有啲失望，搭咗咁耐車去到嗰度，無辦法唯有轉車返 Bucharest。不過如果唔係搭呢程車，又唔會見到啲咁靚嘅雪景。途中，黑仔話諗返起尋日我哋仲諗緊去唔去 Black Tower 影相，當時可以選擇去或者唔去，但係宜家已經成為過去，唔可以再改變，好得意⋯⋯我估唔到黑仔會咁諗嘢㗎，佢唔似，佢似嗰啲向前望唔向後望嘅人，唔似啲會發夢嘅人。
Bucharest
返到 Bucharest ，12點多啲，我哋拎住啲行李搵今日住嘅 Hostel，落咗車之後，我哋行咗好遠去搵地鐵站，轉兩程地鐵嚟到最近 Hostel 嘅地鐵站落車。呢度啲地鐵好陰沉，成10分鐘先有一班車，相比起嚟，香港啲地鐵好好多。落車搵 Hostel 都搵咗好耐，我嗰陣已經好肚餓，我開始有啲發脾氣(對唔住呀黑仔）。最後搵咗呢間 Youth Hostel Villa Helga，放低嘢就出去搵嘢食，又要行返去好遠嘅地鐵站，搭2個站轉一次車，去返我第一晚同黑仔等火車時坐咗好耐嗰間 Coffee Right 食，果陣差唔多4點。
Bucharest
食完嘢我哋去搵一間修道院，想搭20號巴士，搵唔到售票處，跟住搭的士去一個轉車站再轉車，結果都搵唔到我哋要搭嘅車，大概5點，我哋決定唔搵，行返去市中心。行行下黑仔話去另一間修道院，係佢第一日自己去過嘅，覺得幾靚。我哋去到裡面啲人好似崇拜緊咁，有個男人唱緊歌，好好聽㗎。
Bucharest
之後繼續行返去市中心，呢個城巿係好城市嘅感覺，同之前果啲完全唔同，我唔係咁鍾意。但黑仔話好多首都都係咁，其實呢個城市啲建築物係好靚，靚過晒之前嗰啲，窗邊雕晒花架！今晚我地都係買嘢返嚟煮，好多 Supermarket 都收晒好彩最後又搵到一間，都係食茄汁螺絲粉，午餐肉，牛肉粒仲有雞蛋，今餐已經整得好純熟，無咩出錯，仲食得好飽好飽，飽到黑仔要“拉直條腸”坐，呢間 Hostel 好暖呀！
Bucharest
今日唔知點解心情咁差，仲要發脾氣，黑仔都費事理我，我覺得自己好衰！今日係最唔開心嘅一日，不過頭先影佢啲詐瞓相又開心返晒，好低能㗎！一陣要寫返幾隻字畀佢先。聽朝打算7點鐘起身，去搵多一間修道院同皇宮，'希望一切順利啦！希望小魚張機票無問題，聽日可以一齊返香港。
Bucharest
早上7點，出發去修道院，大霧到吖，行出 Hostel 條街矇查查，成個城市即刻唔同咗，黑仔話霧鎖布加勒斯特，雖然無藍天，我哋都照去啦。 呢個城市搵車搭比較麻煩，啲街好長，好似好遠先有一個站，又冇咩售票處，我哋搭5號車去到總站，落車再轉巴士，呢兩日出街黑仔都成日睇住佢地圖。
Manastirea Cernica / Bucharest
去到霧鎖修道院，大霧到好似仙境咁，好靚！我哋喺入面行咗一陣，10分鐘左右嘅時間，已經有大藍天出現，再行多一陣，太陽出來了，成個天藍晒，實在太好喇，一程影到兩種景色。黑仔喺修道院四圍行，有個神父叫佢上二樓，有間房，神父叫佢入去，一開門⋯⋯原來係廁所，乜佢個樣似搵廁所咩？
Bucharest
返到市中心去咗麥當奴食嘢，黑仔旅程嘅第一餐同最後一餐都喺呢間麥當奴食，原來麥當奴都好貴㗎，兩個人食咗60幾蚊。食完嘢11點幾，我哋已經無咩錢剩，得番幾萬 Lei，即係30-40蚊左右，我哋搭地鐵去埋最後一站皇宮，搭2個站轉1個站，出咗地鐵問人，估唔到果個人識英文，我哋沿住佢講嘅方向行，行咗好遠都搵唔到入口，唔知嗰座係咪皇宮，又唔知皇宮係咪唔比人参觀，可能有國旗、守衛好似好深嚴嗰座就係啦！嗰時已經12點幾，我哋趕住返 Hostel 執嘢，搭地鐵再轉巴士，黑仔話最遲1點鐘離開 Hostel。
Bucharest
上咗巴士一陣，黑仔發覺唔對路，上咗反方向車，即刻落車，邊行邊搵巴士站，最後跑返去啦！佢揸住幅地圖，一路走一路睇都唔會迷失路，好勁！佢隻的又痛，又要跑，又要搵路都幾辛苦。我諗嗰時已經過咗一點。返到 Hostel，火速執嘢去埋廁所即撇，成個旅程最熱，第一次流汗。跑出門口400米左右，突然發覺漏咗電話喺 Hostel 張床度，即刻放低晒啲行李跑返轉頭，好彩搵到。跑返落街，黑仔已去到街尾，我地拎住行李趕去搭巴士，因為身上無錢搭唔到的士，點知巴士勁多人。要等幾架先上到，好彩上到車咋，上唔到唔知點算！搭完巴士再轉另一架機場巴士，搵咗一陣，等咗一陣，好彩好快有車。上車先發覺只係20,000 Lei 一個人，我哋有7萬幾剩，早知之前搭的士嚟。去到機場兩點幾，一切順利，感謝神 ！飛機 Delay 咗幾個字，喺機場啲商舖行來行去，都買唔到嘢比小魚，黑仔用埋啲錢買咗枝可樂，嗰時都未知小魚點。
